د. أحمد خطيب: علاج السمنة مش سحر، هو علاج لمرض مزمن، ولازم يكون تدريجي ويترافق مع تغيير بنمط الحياة

, تم النشر 2026/07/22 16:46

الدكتور أحمد خطيب أخصائي غدد صماء ومدير وحدة السكري في كلاليت يجيب على اسئلة المتعالجين

سؤال:
أنا بعاني من السمنة صرلي سنين، وبخاف آخد علاج دوائي أو أدخل مادة غريبة على جسمي.
د. أحمد خطيب: بفهم هاد الخوف. في إبر لعلاج السمنة بلّشوا يستخدموها بعلاج السكري قبل حوالي 20 سنة.
من ناحية الأمان، هاي الأدوية بستخدموها ملايين الناس بالعالم من سنين طويلة، واليوم عنا ثقة كبيرة جدًا فيها.
بالعلاجات الأحدث كمان منشوف أعراض جانبية أقل. وكمان كطاقم طبي صار عنا خبرة كيف نعطي الدوا صح، كيف نرفع الجرعة تدريجيًا، وشو وكيف لازم نوكل.
المادة الفعّالة بالإبر بتقلّد هرمونات طبيعية اللي الجسم بفرزها بعد الأكل. هاي الهرمونات بترتبط بمستقبِلات خاصة بالخلايا، وبتفعّل تفاعلات بتبطّئ إفراغ المعدة، بتزيد الإحساس بالشبع، بتوازن السكر بالدم وبتخفّف الشهية.
غير نزول الوزن، في علاجات إلها فوائد صحية مهمة وبتقلل خطر الجلطة القلبية والسكتة الدماغية.
كمان بتساعد على توازن السكر، وتقليل ضغط الدم والدهون، وبتحسن وظيفة القلب والأوعية الدموية، وبتخفف الالتهاب، وممكن تحسّن النوم والطاقة بشكل عام.
العلاج مش سحر، هو علاج لمرض مزمن، ولازم يكون تدريجي ويترافق مع تغيير بنمط الحياة، أكل متوازن ونشاط بدني.
ومهم تعرفوا إنو زي أي مرض مزمن، علاج السمنة كمان بده متابعة واستمرارية.